Каспий теңізіндегі қайғылы оқиғадан кейін 14 әскери қызметші қаза тапқан соң, Qumash.kz редакциясы Қорғаныс министрлігіне, Ұлттық ұланға және Мемлекеттік күзет қызметіне (МКҚ) ресми сауал жолдады. Алғашқы екі орган жауап беріп үлгерген. Енді МКҚ-дан да жауап келді.
Редакция Мемлекеттік күзет қызметінің әскери қызметшілері арасында соңғы жылдары болған өлім-жітім мен қаза болу жағдайлары туралы статистикалық мәліметтерді сұрады.
Атап айтқанда, мына сұрақтарға жауап беруді өтіндік:
1991 жылдан бері Мемлекеттік күзет қызметінің қанша әскери қызметшісі қайтыс болды немесе қаза тапты? 2021, 2022, 2023, 2024, 2025 және 2026 жылдары қанша әскери қызметші көз жұмды? Сондай-ақ әскери қызметшілердің өлім себептерін нақтылап, мерзімді және келісімшарт бойынша әскери қызмет атқаратындар туралы бөлек мәлімет беруді сұрадық.
Редакция сауалына берген жауабында МКҚ қаза тапқан әскери қызметшілер туралы ақпаратты ұсынудан бас тартты.
"Сауалыңызды қарастырып, сұратылған мәліметтердің қолжетімділігі шектеулі ақпаратқа жататынын хабарлаймыз. Қазақстан Республикасының "Масс-медиа туралы" заңының 36-бабы 2-тармағының 3) тармақшасына сәйкес, сұратылған ақпарат қолжетімділігі шектеулі ақпаратқа жататын болса, сауал бойынша ақпарат беруден бас тартылады", – делінген жауапта.
Бұған дейін Qumash.kz Қазақстан тәуелсіздік алғаннан бері әскери қызметшілердің қаза болуына қатысты статистиканы білу үшін Қорғаныс министрлігі мен Ұлттық ұланға да сауал жолдаған еді. Екі орган да бұл мәліметтерді жариялаудан бас тартты. Олардың мәлімдеуінше, ақпарат қызметтік сипатқа ие және ашық қолданысқа жарияланбайды.
Қорғаныс министрлігі әскери қызметшілердің қаза болуы немесе жарақат алуының әрбір фактісі бойынша қызметтік тергеу жүргізілетінін, оқиғаның мән-жайы анықталып, қажет болған жағдайда оқиға орнына арнайы комиссия жіберілетінін хабарлаған. Ал Ұлттық ұлан әскери қызметшілердің қауіпсіздігі қолбасшылықтың тұрақты бақылауында екенін мәлімдеген.
Каспийдегі қайғылы оқиға
2026 жылғы 24 қыркүйекте Маңғыстау облысында өткен әскери-теңіз жаттығулары кезінде ауа райы күрт нашарлап, 17 әскери қызметші теңізге түсіп кеткен. Олардың үшеуі аман қалып, 14-і қаза тапты.
2026 жылдың басынан қыркүйек айының соңына дейін Қорғаныс министрлігі мен Ұлттық ұлан құрылымдарында 23 әскери қызметшінің қаза болғаны туралы ақпарат белгілі болды. Олардың қатарында Каспийдегі жаттығу кезінде көз жұмған 14 әскери қызметші бар. Бұл есеп бұқаралық ақпарат құралдарындағы жарияланымдарға негізделген және толық ресми статистика болып саналмайды.
Ресми Telegram-арнаға жазылыңыз: Qumash.kz
Qumash.kz енді Google Жаңалықтарында Басты жаңалықтардан хабардар болыңыз Жазылу
