Қазақстанның ірі кәсіпорындарынан, кәсіпкерлер мен меценаттардан түскен қаражатты бөлу жөніндегі комиссия жұмысының қорытындысы жарияланды, деп хабарлайды Qumash.kz.
Не болды?
Маңғыстау облысының әкімдігі Қазақстан Халық Кеңесінің мүшесі, өңірлік Қоғамдық кеңестің төрағасы Бекмұрат Жүсіповтің мәлімдемесін жариялады.
Ол Мемлекет басшысының тапсырмасына сәйкес қаза тапқан әскери қызметшілердің отбасылары мен зардап шеккен әскери қызметшілерге қажетті көмек көрсетіліп жатқанын еске салды.
Қаражат қалай бөлінді?
Еліміздің ірі кәсіпорындарынан, кәсіпкерлер мен меценаттардан түскен қаржыны жинақтау үшін "Ұлттық рух" арнайы қоры құрылған.
Түскен қаражатты әділ әрі мақсатты бөлу үшін арнайы комиссия жасақталды. Оның құрамына құқық қорғау органдарының, қоғамның өкілдері, Құрылтай депутаттары, Қазақстан Халық Кеңесінің мүшелері, қоғамдық кеңестер мен мәслихат өкілдері кірді.
"Комиссия жұмысының қорытындысы бойынша қорға түскен барлық қаражат қабылданған шешімдерге сәйкес және заңнамада белгіленген тәртіппен қаза тапқан әскери қызметшілердің отбасылары арасында әділ әрі тең бөлінді", – деді Бекмұрат Жүсіпов.
Бұдан бөлек, оқиғадан аман қалған әскери қызметшілерге де жеке төлемдер қарастырылған. Оларға көрсетілген материалдық көмектің мөлшері комиссия шешімдеріне сәйкес белгіленген.
Қаражаттың бөлінуі барлық кезеңде бақыланды
Қаражатты есепке алу және бөлу жөніндегі шешімдердің барлығы комиссия жұмысы аясында қабылданған. Олар хаттамамен рәсімделіп, белгіленген заңдық рәсімдер сақталған. Бұл жұмысқа қаза тапқан сарбаздардың ата-аналары да қатысқан.
"Осылайша, комиссия қаражаттың қорға түскен сәтінен бастап алушыларға аударылғанға дейінгі барлық кезеңде қатаң бақылауды қамтамасыз етті", – делінген Маңғыстау облысы әкімдігінің мәлімдемесінде.
Әскери қызметшілердің туған-туыстарының өтініші бойынша, сондай-ақ олардың қауіпсіздігі мен жеке деректерінің құпиялығын сақтау мақсатында нақты төлем сомалары мен қаражат алушылардың жеке мәліметтері жарияланбайды.
Комиссия жұмысы аяқталды. Қорға түскен барлық қаражат белгіленген тәртіппен бөлініп, тиісті шешімдер құжат жүзінде рәсімделді.
Қайғылы оқиға 24 қыркүйекте Каспий теңізінде өткен әскери-жауынгерлік оқу-жаттығу кезінде болған. Кенеттен соққан жел мен ауа райының нашарлауына байланысты 17 әскери қызметші теңізге ағып кеткен.
Олардың 14-і қаза тауып, үшеуі аман қалған. Алғашында 12 әскери қызметшінің қаза болғаны хабарланды. 25 қыркүйекте Каспий теңізінен тағы екі матростың денесі табылды.
2026 жылғы 27 қыркүйекте Қасым-Жомарт Тоқаев Қорғаныс министрі Дәурен Қосановты қызметінен босатты. Кейін ведомствоны Айдос Мырзахметов басқарғаны белгілі болды.
3 қазанда Президент Қорғаныс министрлігінің үш жоғары лауазымды басшысын, соның ішінде Қазақстан Республикасы Қарулы күштері Әскери-теңіз күштерінің бас қолбасшысын қызметінен босатты.
Ресми Telegram-арнаға жазылыңыз: Qumash.kz
Qumash.kz енді Google Жаңалықтарында Басты жаңалықтардан хабардар болыңыз Жазылу
