Теміртауда ата-анасын өлтірді деген күдікпен ұлы ұсталды

Теміртауда екі ерлі-зайыптының өліміне қатысты қылмыстық іс тергеліп жатыр. Олардың 52 және 49 жастағы денелері пәтерден табылған. Басты күдікті – ерлі-зайыптылардың ұлы, деп хабарлайды Qumash.kz

Қайғылы оқиғаның мән-жайы

Оқиға бесінші қабаттағы пәтерде болған. Көршілердің айтуынша, сол түні әйел баспалдақ алаңына жүгіріп шығып, қатты айқайлап, көмек сұраған. Бұл туралы КТК телеарнасы хабарлады.

Осыдан кейін тұрғындар полиция шақырған. Пәтерге кіру үшін есікті бұзуға тура келген. Ішінде және дәлізде қан болған.

Алдын ала мәлімет бойынша, 20 жастағы жігіт әкесіне пышақпен алты рет, ал анасына тоғыз рет соққы жасаған. Одан кейін оқиға орнынан қашып кеткен.

Көршілері не дейді?

"Ол ата-анасын өлтіріп, есікті жауып, кетіп қалған. Таңертең ұсталды. Үйдің ортақ чатында оның қолға түскені туралы ақпарат тарады. Айтуларынша, ол ата-анасының өз еркіндігін шектейтініне наразы болған. Бірақ қандай еркіндік туралы сөз болғанын білмеймін", – деді Елена Маскаева.

Көршілерінің айтуынша, отбасы бұл үйге бір жарым жыл бұрын көшіп келген. Сырт көзге олар сабырлы адамдар болып көрінген. Ал ұлын өте тыныш, тіпті жасқаншақ жігіт ретінде сипаттайды. Сондықтан болған оқиға тұрғындар үшін күтпеген жағдай болған.

"Жедел-іздестіру іс-шаралары барысында полиция қызметкерлері осы қылмысты жасады деген күдікпен 20 жастағы ұлын анықтап, ұстады. Ол уақытша ұстау изоляторына қамалды", – деп хабарлады облыстық Полиция департаменті.