Астана қалалық сотының азаматтық істер жөніндегі сот алқасы бұрынғы қызметкердің "Нұрсұлтан Назарбаев халықаралық әуежайы" АҚ-ға қарсы талап-арызы бойынша бірінші сатыдағы сот шешімінің күшін жойды. Әйел бұрынғы қызметіне қайта орналастырылып, жұмыс берушіге амалсыз бос жүрген уақыты үшін жалақысын төлеу міндеттелді.
"Құжат айналымы бөлімінің басшысы қызметінің орнына қызметкерге басқа бөлімшедегі маман лауазымы ұсынылған. Бұл іс жүзінде еңбек функциясын өзгертуді және басқа жұмысқа ауыстыруды білдіреді", – деп түсіндірді сотта.
Алайда жұмыс беруші әйелдің басқа қызметке ауысуына келісімін алмаған. Ал оның ұсынылған бос орыннан бас тартуын еңбек қатынастарын жалғастырудан бас тарту деп бағалаған.
Бұдан бөлек, жаңа бөлімшенің лауазымдық нұсқаулығы қызметкер жұмыстан шығарылғаннан кейін, 2026 жылғы 9 сәуірде бекітілген. Ал әйел 6 сәуірде жұмыстан босатылған. Сот жұмыс беруші еңбек шартын тоқтатуға заңды негіз болғанын дәлелдей алмаған деген қорытындыға келді.
Бұған дейін Астана қаласының азаматтық істер жөніндегі ауданаралық соты талап-арызды қанағаттандырудан бас тартқан еді. Апелляциялық алқа бұл шешімнің күшін жойып, жаңа қаулы шығарды. Сот жұмыстан шығару туралы бұйрықты заңсыз деп танып, әйелді құжат айналымы бөлімінің басшысы қызметіне қайта орналастырды. Сондай-ақ әуежайдан алты айлық амалсыз бос жүрген уақыты үшін шамамен жеті миллион теңге жалақы өндіріп алды.
Сот актісі заңды күшіне енді.
іздеу