Қазақстан азық-түліктің жартысына жуығын Ресейден импорттайды: ел не сатып алады

Сонымен қатар бидай импорты бір жылда үш есе өскен. Мұндай деректерді EnergyProm жариялады.

Сарапшылардың мәліметінше, қаңтар-тамыз айларында азық-түлік импорты былтырғы жылдың сәйкес кезеңімен салыстырғанда 6,2%-ға артқан. Азық-түлік өнімдері барлық импорттың 11,8%-ын құрады. ТМД елдерінен жеткізілім 8,6%-ға өсіп, 3,1 млрд долларға жетсе, басқа мемлекеттерден импорт 2,6%-ға артып, 1,9 млрд доллар болған.

"Он жыл ішінде азық-түліктің жылдық импорты 2015 жылғы 3,4 млрд АҚШ долларынан 2025 жылы 7,4 млрд долларға дейін өсті", – деп атап өтті сарапшылар.

Қазақстан азық-түлікті қай елдерден әкеледі?

Азық-түліктің ең ірі жеткізушісі – Ресей. Сегіз айда бұл елден 2,4 млрд долларға өнім импортталған. Бұл былтырғы көрсеткіштен 9,8%-ға көп. Қазақстанның азық-түлік импортындағы Ресейдің үлесі 46,3%-дан 47,7%-ға өскен.

Екінші орында – Қытай. Бұл елден жеткізілім 24,2%-ға артып, 407,6 млн долларға жеткен. Одан кейін Беларусь (244,6 млн доллар) пен Өзбекстан (234,2 млн доллар) тұр. Ірі жеткізушілер арасында Бразилиядан импорт 38,4%-ға, Германиядан 27,4%-ға өсіп, ең жоғары қарқын көрсеткен.

Шоколад, қант және бидай

Жекелеген тауар санаттары арасында ең үлкен үлес шоколад пен какао қосылған өнімдерге тиесілі. Қаңтар-тамыз айларында Қазақстан оларды 318,3 млн долларға импорттаған. Бұл былтырғы жылдың сәйкес кезеңімен салыстырғанда 16,2%-ға көп.

Сондай-ақ импорт көлемі жоғары тауарлар қатарында 291,5 млн долларға жеткізілген өзге де азық-түлік өнімдері, 251,2 млн долларға импортталған нан және ұннан жасалған кондитерлік өнімдер, сондай-ақ 235,1 млн долларға жеткізілген қант бар.

Бидай импортының өсімі ерекше байқалады. Сегіз айда Қазақстан 191,3 млн долларға 1,2 млн тонна астық әкелген. Былтыр бұл көрсеткіш 392,4 мың тонна болған. Осылайша, жеткізілім көлемі шамамен үш есе артқан. Импортталған бидайдың басым бөлігі Ресейден келген.

Ал картоп импорты үш есеге жуық қысқарды: 201,9 мың тоннадан 68,8 мың тоннаға дейін төмендеген.

Қазақстан қай елдерге тәуелді?

Бидай импортының 99,6%-ы, арпа жеткізілімінің 99,9%-ы және күнбағыс, мақсары мен мақта майы импортының 95,7%-ы Ресейге тиесілі. Сондай-ақ қанттың 79,1%-ы, маргариннің 80,1%-ы және шоколадтың 71,4%-ы осы елден жеткізілген.

Басқа өнімдер бойынша негізгі жеткізушілер – жекелеген мемлекеттер. Қазақстан бананның 98,5%-ын Эквадордан, пияз бен сарымсақтың 87,2%-ын Өзбекстаннан, цитрус жемістерінің 79,6%-ын Қытайдан, какао бұршақтарының 73,8%-ын Ганадан, ал қызанақтың 72,1%-ын Түрікменстаннан сатып алған.

Бұған дейін 20 қазаннан бастап Қазақстан дүкендері жаңа ережелер бойынша жұмыс істей бастағаны хабарланған еді. Әңгіме отандық тауарлардың міндетті үлесіне қатысты талаптар туралы. Енді сауда желілерінің сөрелерінде қазақстандық өндірушілерге басымдық беріледі.