Арман жұмыс па, әлде кілем тасу ма:ІІІ Карл король сарайға қызметкер іздеп жатыр

Бірақ кеңсе креслосында отырудың орнына король сарайындағы антиквариат пен жиһазды жылжытуға тура келеді.

Букингем сарайында Palace Attendant – ресми қабылдауларға арналған бөлмелерді дайындауға және Ұлыбритания корольдік отбасының резиденциясындағы жұмыстарға көмектесетін қызметкер лауазымына конкурс жарияланды. Өтінімдерді 2026 жылғы 25 қазанға дейін беруге болады.

Қазақстанда қалыпты жұмысын король сарайындағы тіршілікке айырбастауды көптен армандап жүргендер болса, бұл хабарландыруға көз жүгіртіп көруге себеп бар. Бұған дейінгі жұмыс тәжірибесі міндетті емес: жұмыс беруші жаңа қызметкерді өзі оқытуға уәде береді.

Алайда бірден босаңсуға болмайды. Міндеттерге сән-салтанаты келіскен бөлмелерде жүру ғана емес, күн сайын жиһазды, кілемдерді, өнер туындыларын, антиквариат пен жүкті тасымалдау да кіреді. Сонымен қатар залдарды іс-шараларға дайындап, қонақтарды қарсы алуға көмектесу және тәртіпті қадағалау қажет. Кей жағдайда баспалдақтар мен арнайы жабдықтарды пайдаланып, биіктікте жұмыс істеуге тура келеді.

Мысалы, қызметкер 200 адамға арналған қабылдауларға үстел әзірлеуге көмектесуі керек. Ал сарайда іс-шаралар өткен кезде қызметкерлер тобы барлық заттың өз орнында тұруын қамтамасыз етіп, қонақтарға сахна сыртындағы қарбаласты байқатпауға тиіс.

Бұл – тұрақты жұмыс. Апталық жұмыс уақыты дүйсенбіден жексенбіге дейін 40 сағатты құрайды. Артықшылықтар қатарында баспана, жұмыс орнында тегін түскі ас, 25 күндік еңбек демалысы, мемлекеттік мерекелердегі демалыс және зейнетақы бағдарламасы көрсетілген. Жалақының нақты мөлшері жарияланбаған, хабарландыруда оның бәсекеге қабілетті болатыны ғана айтылған.

Ал қазақстандықтар өтінім бере ала ма? Өтінімді ресми сайт арқылы жіберуге болады. Алайда оған дейін Ұлыбританияда жұмыс істеу құқығына қойылатын талаптарды тексерген жөн. Хабарландыруда шетелден үміткерлерге жұмыс визасын рәсімдеп беру қарастырылмаған.

Вакансия Ұлыбритания корольдік әулетінің ресми сайтында жарияланған. Өтінім қабылдаудың соңғы күні – 25 қазан.

Енді ең басты сұрақ: король сарайында түскі ас ішу үшін күн сайын кілем тасуға кім дайын?