Кездесуде жаңа қоғамдық институттың міндеттері, конституциялық реформалар, мемлекеттік тілдің қолданыс аясын кеңейту және жастар бастамаларын қолдау бағыттары да сөз болды.
Жиынға қала әкімінің орынбасары Сәрсен Құранбек, Қазақстан Халық Кеңесінің мүшелері, этномәдени бірлестіктердің жетекшілері мен этнос белсенділері, сондай-ақ "Қоғамдық келісім" мекемесі жанындағы қоғамдық құрылымдардың басшылары қатысты.
Кездесудің басты мақсаты – Қазақстан Халық Кеңесінің қызметі мен алдағы міндеттерін түсіндіру ғана емес, өңірдегі қоғамдық келісімді нығайтуға қатысты ұсыныстарды ортаға салу болды. Сонымен қатар мемлекеттік органдар мен азаматтық қоғам арасындағы байланысты дамыту, тұрғындарды толғандыратын мәселелерді талқылау және ортақ бастамаларды жүзеге асыру жолдары қарастырылды.
Жаңа қоғамдық институттың міндеттері талқыланды
Жиында сөз сөйлеген қала әкімінің орынбасары Сәрсен Құранбек Қазақстан Халық Кеңесінің құрылуы мен оның қоғамдық-саяси өмірдегі рөліне тоқталды. Ол жаңа Конституцияның маңызы, Мемлекет басшысының Қазақстан халқына Жолдауында белгіленген басым бағыттар және конституциялық реформалардың негізгі міндеттері туралы баяндады.
Сондай-ақ қоғамды біріктіретін ортақ құндылықтарды қалыптастыру мен оларды күнделікті өмірде орнықтырудың маңыздылығы атап өтілді. Олардың қатарында тәуелсіздік пен отаншылдық, бірлік пен ынтымақ, әділдік пен жауапкершілік, заң мен тәртіп, еңбекқорлық пен кәсіби біліктілік, жасампаздық пен жаңашылдық бар.
Кездесуде "Адал азамат" және "Таза Қазақстан" бастамаларына да назар аударылды. Бұл бағыттар аясында қоғамда жауапкершілік мәдениетін қалыптастыру, ортақ ережелерді құрметтеу және жаңа қоғамдық этиканы орнықтыру мәселелері сөз болды.
Мемлекеттік тіл мен ұлттық құндылықтарға назар аударылды
Кездесудің тағы бір маңызды тақырыбы – мемлекеттік тілдің қолданыс аясын кеңейту және ұлттық құндылықтарды дәріптеу болды. Осы орайда жақында өткен "Қазақ тілі" қоғамының Х мерейтойлық құрылтайының маңызы мен онда көтерілген мәселелер талқыланды.
Қатысушылар тіл саясаты, ұлттық мұраны сақтау және қоғамдық сананы жаңғырту бағытындағы бастамаларға тоқталды. Мемлекеттік тілдің қоғам өміріндегі орнын нығайту және оны кеңінен қолдануға ықпал ететін жұмыстар да назарға алынды.
Қоғамдық диалог пен жастар бастамалары
Кездесудің ашық пікір алмасу бөлімінде қатысушылар өздерін толғандырған мәселелерді көтеріп, бірқатар ұсыныстарын жеткізді. Атап айтқанда, этносаралық татулықты сақтау, қоғамдық келісімді нығайту, жастар бастамаларын қолдау және медиация институтын дамыту мәселелері талқыланды.
Сонымен қатар қоғамдық диалогты кеңейту, азаматтық қоғам өкілдерінің мемлекеттік органдармен байланысын жетілдіру және өзара ынтымақтастықты күшейту жөнінде пікірлер айтылды.
Медиация институтын дамыту да талқыланған маңызды бағыттардың бірі болды. Бұл тетік қоғамдағы келіспеушіліктерді өзара түсіністік арқылы шешуге және азаматтар арасындағы диалог мәдениетін қалыптастыруға мүмкіндік беретін құралдардың бірі ретінде қарастырылды.
Жалпы, кездесуде қоғамдық құрылымдардың жұмысын жандандыру, олардың бастамаларын қолдау және тұрғындармен байланысты нығайту мәселелеріне басымдық берілді.
Шымкенттен Қазақстан Халық Кеңесіне үш өкіл енді
Айта кетейік, Шымкент қаласынан үш азамат Қазақстан Халық Кеңесінің құрамына енді. Олар – қалалық түрік этномәдени бірлестігінің төрағасы Латипша Асанов, журналист әрі қалалық Қоғамдық кеңестің мүшесі Әбдез Иманқұлов және көркем гимнастика шебері, Қазақстан ұлттық гимнастика федерациясының президенті Әлия Юсупова.
Олардың Кеңес құрамына енуі қаладағы қоғамдық, мәдени және спорт салаларының өкілдігін қамтамасыз ету тұрғысынан маңызды.
Кездесу ашық форматта өтіп, қатысушылар өзекті мәселелер бойынша пікір алмасып, алдағы жұмысқа қатысты ұсыныстарын ортаға салды. Жиын қорытындысында қоғамдық келісімді сақтау, этносаралық татулықты нығайту, азаматтық қоғам институттарымен өзара іс-қимылды дамыту және ортақ бастамаларды жүзеге асыру бағытындағы жұмысты жүйелі түрде жалғастыру қажеттігі атап өтілді.
Осылайша, Шымкенттегі кездесу қоғамдық құрылымдар мен мемлекеттік органдар арасындағы байланысты нығайтуға, сондай-ақ өңірдегі бірлік пен келісімді сақтауға бағытталған бастамаларды талқылайтын алаңға айналды.
іздеу