"Бәріміздің зәреміз ұшты"
Threads әлеуметтік желісінде SCAT әуе компаниясының Мәскеу–Алматы бағытындағы рейсінің жолаушылары ұшақтың Астана әуежайына шұғыл қонғанын хабарлады.
Жолаушылардың бірі ұшақтағы жағдайға қарамастан, әуе компаниясы оларға бірден су ұсынбағанына наразылық білдірді. Оның айтуынша, жолаушылар дүрбелеңге түсіп, не болғанын түсінбей тұрған кезде оларға су да, тамақ та берілмеген. Сондай-ақ әуе компаниясы тарапынан ешқандай ақпарат болмаған.
"Түсінемін, бұл – штаттан тыс жағдай. Ұшақтағы бәріміздің зәреміз ұшты. Бірақ жолаушыларға неге тіпті су да ұсынбадыңыздар? Біз шу шығарғанға дейін қорқып, абдырап қалған жолаушыларды аяқтарынан тік тұрғызып, сусыз, тамақсыз және ең бастысы, ешқандай ақпарат бермей ұстадыңыздар", – делінген жарияланымда.
SCAT әуе компаниясы не деп жауап берді?
Әуе компаниясы жолаушының жазбасына пікір қалдырып, ұшақтың шұғыл қонғанын растады.
"Сіздің рейсіңіз бойынша шынымен де шұғыл қону жүзеге асырылды. Осыған байланысты жолаушыларға ауызсу ұсыну біраз уақыт алды. Себебі барлық жолаушыны сумен қамтамасыз ету үшін алдымен оны әуежайға жеткізуді ұйымдастыру қажет болды", – деп жазды компания өкілдері.
SCAT жолаушылардан қолайсыздықтар үшін кешірім сұрады.
SCAT-қа қатысты шағымдар
Айта кетейік, қазақстандықтар бұған дейін де SCAT әуе компаниясының қызметіне шағымданған. Мәселен, бұған дейін әуе тасымалдаушы жолаушының жүгін ұмытып кетіп, кейін оны Үшаралдың орнына Үржарға жіберген болатын.
Кейін SCAT Үшаралға жетуі тиіс жүгі Үржардан табылған жолаушыға жауап берді. Әуе компаниясы оған бірнеше күн күту немесе чемоданын өзі барып алып кету нұсқаларын ұсынған.
іздеу