Мемлекет басшысы Қасым-Жомарт Тоқаевтың 2026 жылғы 28 қазандағы "Жаңа тарихи кезеңдегі Қазақстанның өзекті міндеттері" атты Қазақстан халқына Жолдауында айқындалған негізгі бағыттарды түсіндіруге және оларды жүзеге асырудағы жоғары оқу орындарының рөлін талқылауға арналған жиын өтті.
Кездесу барысында елдің әлеуметтік-экономикалық дамуы үшін маңызды саналатын құрылыс және инфрақұрылым, су ресурстарын тиімді басқару, атом энергетикасын дамыту, ғылыми-техникалық әлеуетті арттыру және азаматтық жауапкершілікті қалыптастыру мәселелері кеңінен қарастырылды. Сонымен қатар Жолдауда белгіленген міндеттерді орындауда жоғары білім беру жүйесінің мүмкіндіктері, ғылым мен өндіріс арасындағы байланысты нығайту және еңбек нарығында сұранысқа ие мамандар даярлау мәселелеріне назар аударылды.
Іс-шараны университет ректорының міндетін уақытша атқарушы Рысгүл Құдретуллаева ашып, Мемлекет басшысының Жолдауында көтерілген бастамаларды іске асыруда білім беру ұйымдарына жүктелетін жауапкершіліктің маңызын атап өтті. Оның айтуынша, жоғары оқу орындары тек білім берумен шектелмей, ел экономикасының қажеттіліктеріне жауап бере алатын кәсіби мамандар даярлауға, ғылыми ізденістерді дамытуға және заманауи технологияларды оқу үдерісіне енгізуге басымдық беруі қажет.
"Мемлекет басшысы айқындаған стратегиялық міндеттерді жүзеге асыруда жоғары оқу орындарының орны ерекше. Бүгінгі білім беру жүйесі заман талабына сай жаңарып, экономика мен қоғамның сұранысына жауап бере алатын білікті мамандар даярлауы тиіс. Ғылымды дамыту, инновациялық технологияларды енгізу және жастардың кәсіби құзыреттерін қалыптастыру – университет жұмысының негізгі басымдықтарының бірі", – деп атап өтті Рысгүл Құдретуллаева.
Жиынның негізгі бөлімінде Президент Жолдауындағы басымдықтар салалық баяндамалар арқылы тарқатылып, олардың университет қызметімен байланысы түсіндірілді. Спикерлер өз бағыттары бойынша атқарылып жатқан жұмыстарға тоқталып, алдағы кезеңде мамандар даярлау, ғылыми зерттеулер жүргізу және технологиялық жаңашылдықтарды енгізу бағытында назар аударуды қажет ететін мәселелерді ортаға салды.
Алғашқы болып "Құрылыс және инфрақұрылымды дамыту мәселелері" тақырыбында баяндама жасаған Асқар Мамырбаев Мемлекет басшысы ұсынған "Халықтық құрылыс" бастамасының мәні мен маңызына тоқталды. Ол әлеуметтік инфрақұрылымды дамытуда құрылыс саласының орны ерекше екенін атап өтіп, заманауи талаптарға сай нысандарды жобалау мен салу үшін білікті сәулетшілердің, инженерлердің және қала құрылысы мамандарының қажеттігін түсіндірді.
Баяндама барысында қалалық ортаны жоспарлау, инфрақұрылымдық жобаларды сапалы жүзеге асыру және құрылыс саласындағы кәсіби құзыреттерді жетілдіру мәселелері қозғалды. Осы ретте "Сәулет және қала құрылысы" кафедрасының басты міндеттерінің бірі – саланың қазіргі сұранысына сәйкес келетін, теориялық білімі мен практикалық дағдылары қалыптасқан мамандар даярлау екені атап өтілді. Бұл бағыттағы білім беру жұмыстары болашақ мамандардың кәсіби дайындығын жетілдіруге және құрылыс саласының кадрлық әлеуетін нығайтуға бағытталған.
Келесі кезекте техника ғылымдарының кандидаты, доцент Парида Сұлтанбекова "Су ресурстары – ұлттық қауіпсіздік пен тұрақты дамудың негізі: Президент Жолдауы аясындағы міндеттер" тақырыбында баяндама жасады. Ол су ресурстарының елдің әлеуметтік-экономикалық тұрақтылығын қамтамасыз етудегі стратегиялық маңызына тоқталып, суды үнемдеу, оны тиімді пайдалану және басқару жүйесін жетілдіру мәселелерін түсіндірді.
Сонымен қатар баяндамашы университетте сенсорлық және цифрлық технологияларды қолдану, су шығынын бақылау, білім беру үдерісін жаңғырту бағытында жүргізіліп жатқан жұмыстарды таныстырды. Оның айтуынша, су шаруашылығы саласындағы заманауи міндеттерді шешу үшін дәстүрлі біліммен қатар цифрлық құралдарды меңгерген, технологиялық өзгерістерге бейімделе алатын мамандар даярлау маңызды. Бұл ретте жоғары оқу орындары ғылыми әлеуетті арттырумен қатар, саланың нақты қажеттіліктеріне жауап беретін білім беру бағдарламаларын дамытуға үлес қоса алады.
Жиынның тағы бір маңызды тақырыбы атом энергетикасын дамыту және осы салаға қажетті ғылыми-техникалық кадрларды даярлау мәселесіне арналды. "Физика" кафедрасының доценті, PhD, қауымдастырылған профессор Сапарғали Пазылбек "Қазақстанның атом энергетикасы және ядролық физика мамандарын даярлау" тақырыбында баяндама оқыды.
Ол атом энергетикасының елдің энергетикалық әлеуетін дамытудағы маңызына тоқталып, бұл бағытта кәсіби білімі жоғары, заманауи ғылыми-техникалық талаптарды меңгерген мамандарға сұраныс артып отырғанын жеткізді. Сонымен бірге университетте алдағы уақытта "Ядролық физика" білім беру бағдарламасын ашу жоспарланып отырғанын хабарлады.
Аталған бастама ядролық физика саласындағы білім беру мүмкіндіктерін кеңейтуге және болашақта энергетика саласына қажетті кадрлық әлеуетті қалыптастыруға бағытталған. Бұл ретте ғылыми білімді тереңдету, физика саласындағы зерттеулерді дамыту және жастардың инженерлік-техникалық бағыттарға қызығушылығын арттырудың маңызы атап өтілді.
Жиын барысында елдің технологиялық және экономикалық дамуы үшін кәсіби мамандар даярлаумен қатар, азаматтық құндылықтарды қалыптастыру мәселесі де назардан тыс қалған жоқ. Университеттің баспасөз хатшысы Әзімхан Исабек "Өркениетті мемлекет және "Адал азамат" тұжырымдамасы" тақырыбында баяндама жасап, қоғамдағы адалдық, жауапкершілік, заңға құрмет және белсенді азаматтық ұстанымның маңызына тоқталды.
Баяндамашы білім беру ұйымдарының міндеті тек белгілі бір мамандық бойынша білім мен кәсіби дағдыларды қалыптастырумен шектелмейтінін атап өтті. Жоғары оқу орындары жастардың дүниетанымын кеңейтіп, олардың қоғам алдындағы жауапкершілігін сезінетін, заң талаптарын құрметтейтін және елдің дамуына үлес қосуға ұмтылатын азамат болып қалыптасуына да ықпал етуі тиіс. Осы тұрғыда "Адал азамат" тұжырымдамасының негізгі құндылықтарын білім беру ортасында насихаттаудың маңызы түсіндірілді.
Сондай-ақ энергетика саласындағы технологиялық жаңашылдықтар мен ғылыми зерттеулердің болашағы сөз болды. "Энергетика және дәстүрлі емес энергетикалық жүйелер" кафедрасының PhD, доценті Нұрсұлтан Файз "Атом электр станциясында ядролық реактордың прототипі ретінде цифрлық егізді ендіру" тақырыбында баяндама жасады.
Ол әлемдік дамудың жаңа кезеңінде қалыптасып отырған "Электр дәуірі" ұғымына түсінік беріп, электр энергиясына деген сұраныстың артуы, энергетикалық жүйелерді жаңғырту және Қазақстанда атом энергетикасын дамыту мәселелеріне тоқталды. Сонымен қатар ядролық реактордың жұмыс үдерістерін цифрлық модельдеу мен заманауи инженерлік шешімдерді қолданудың ғылыми-техникалық мүмкіндіктері жөнінде ақпарат ұсынды.
Баяндамада энергетика саласының болашақтағы дамуында цифрлық технологиялар мен инновациялық тәсілдердің маңызына ерекше назар аударылды. Нұрсұлтан Файз жастарға инженерлік және техникалық мамандықтардың перспективаларын түсіндіріп, энергетика бағытындағы жаңа технологияларды меңгерудің өзектілігін атап өтті.
Жалпы, жиын барысында Президент Жолдауында белгіленген стратегиялық басымдықтардың әрқайсысы елдің ұзақ мерзімді дамуы үшін маңызды екені айтылды. Құрылыс пен инфрақұрылымды жетілдіру, су ресурстарын тиімді басқару, атом энергетикасын дамыту және азаматтық жауапкершілікті қалыптастыру бағыттары өзара сабақтас міндеттер ретінде қарастырылды. Бұл салалардың тұрақты дамуы білікті кадрларға, ғылыми зерттеулердің нәтижесіне және заманауи технологияларды тиімді пайдалануға тікелей байланысты.
Әуезов университеті аталған бағыттар бойынша білім беру бағдарламаларын жетілдіруді, ғылыми-зерттеу жұмыстарын дамытуды және еңбек нарығында сұранысқа ие мамандар даярлауды басым міндеттердің бірі ретінде қарастырады. Жоғары оқу орнының ғылыми-білім беру әлеуетін ел дамуының өзекті бағыттарымен ұштастыру арқылы отандық ғылым мен экономиканың дамуына үлес қосу көзделіп отыр.
Кездесу қорытындысында қатысушылар Мемлекет басшысының Жолдауында көтерілген міндеттерді жүзеге асыруда білім мен ғылымның, инновациялық технологиялардың және кәсіби кадр даярлаудың маңызын атап өтті. Жиын Жолдаудың негізгі бағыттарын университет қауымдастығына түсіндіруге, салалық мәселелерді талқылауға және жоғары білім беру жүйесінің ел дамуына қосатын үлесін айқындауға мүмкіндік берді.
іздеу