Бельгия астанасы Брюссельде қазақ халқының мәдениеті мен ұлттық өнерін таныстыруға арналған салтанатты шара өтті. Мәдени кеш Еуропаның тарихи орындарының бірі – ЮНЕСКО-ның Бүкіләлемдік мұралар тізіміне енген Гран-Плас алаңындағы әйгілі қалалық ратушада ұйымдастырылды.
XIV ғасырда салынған бұл сәулет нысаны Брюссельдің басты тарихи көрікті орындарының бірі саналады. Еуропаның дәл ортасындағы осындай ерекше орында өткен мәдени шараға жергілікті тұрғындар, Еуропа елдерінен келген қонақтар және шетелде тұратын отандастарымыз қатысты.
Кештің басты мақсаты – Қазақстанның бай мәдени мұрасын халықаралық қауымдастыққа таныстыру, ұлттық өнердің ерекшелігін көрсету және елдер арасындағы мәдени байланысты нығайту. Осы орайда көрермендерге қазақ халқының дәстүрлі музыкасы, би өнері мен вокалдық шығармалары ұсынылды.
Салтанатты бағдарламада Шымкент қаласындағы "Шымкент концерт" концерттік ұйымының өнерпаздары өнер көрсетті. Ұжым мүшелері ұлттық нақыштағы қойылымдар арқылы қазақ өнерінің өзіндік болмысын, әуен мен ырғақтың байлығын және дәстүр сабақтастығын паш етті.
Кештің музыкалық бөлігін "Қаған" этнофольклорлық ансамблі ашты. Өнерпаздар қазақтың дәстүрлі әуендерін заманауи музыкалық сарындармен ұштастырып, көрермендерге ерекше әсер сыйлады. Ансамбль орындаған шығармалар арқылы ұлттық музыканың терең тамыры мен өзіндік ерекшелігі таныстырылды.
Ал "Яссы" би ансамблі сахнада қазақ биінің әсемдігі мен қимыл үйлесімін көрсетті. Бишілердің өнері көрермендердің назарын аударып, еуропалық қонақтардың ыстық ықыласына бөленді. Ұлттық би арқылы қазақ халқының мәдениеті, салт-дәстүрі мен дүниетанымының көріністері сахна төріне шықты.
Сондай-ақ кеш барысында талантты солистер Айнұр Назарбекова мен Астана Қарғабай ән шырқады. Өнер иелері өздерінің әсем дауыстарымен концерт бағдарламасын толықтырып, көрермендерге музыкалық тарту жасады.
Жалпы, фестиваль аясында қазақ өнерінің түрлі бағыттары бір сахнада тоғысты. Этнофольклорлық музыка, ұлттық би және вокалдық орындаулар арқылы шетелдік көрермендер Қазақстанның мәдениетімен жақынырақ танысуға мүмкіндік алды.
Брюссельдегі тарихи ратушада өткен мәдени кеш Қазақстанның Тәуелсіздік жылдарындағы жетістіктерін таныстырумен қатар, ұлттық өнерді халықаралық деңгейде дәріптеуге бағытталды. Еуропалық көрермендер қазақтың әні мен биін тамашалап, халқымыздың бай мәдени мұрасымен танысты.
Мұндай мәдени кездесулер елдер арасындағы өзара түсіністікті нығайтып, Қазақстанның халықаралық кеңістіктегі мәдени байланыстарын дамытуға ықпал етеді. Ал Тәуелсіздіктің 35 жылдығы қарсаңында Еуропаның тарихи орталығында ұйымдастырылған бұл шара ұлттық өнерді әлемге танытудың тағы бір алаңына айналды.




